Benbecula Night

Bìdh Colaisde Bheinn Na Faoghla, pàirt do Colaiste a’ Chaisteil, a’ gabhail pàirt ann an Celtic Connections airson a’ chiad uair bhon a dh’fhosgail e ann a 2000, anns na City Halls, Glaschu air an 17mh Faoilleach.

Tha an cothrom agaibh na tàileantan ceòl traidiseanta as ùra anns na h-Uibhistean a chluinntinn leis a’ chòmhlan òg, “Flying Fiddles” cuide ri cluicheadairean ainmeil mar Anna-Wendy Stevenson, Iain Dòmhnallach agus Will Lamb: triùir luchd-ciùil a tha air an t-uamhas a dhèanamh airson ìomhaigh cheòl traidiseanta a thogail anns na h-Eileanan mar tha agus le bhith a’ teagasg anns a’ Cholaisde tha iad a’ dèanamh a h-uile sian airson an ath lìnn don dhualchas seo a chumail is a bhrosnachadh.

Tha Anna-Wendy air orcastran a stiùireadh ron an seo, sgil a tha e coltach a tha i air togail on a bhith ag obair le a sheanair Hugh McDiarmid a tha air iomadh pìos a sgrìobhadh airson orcastran thairis air bliadhnaichean agus a-nis tha Anna-Wendy a’ cumail na h- eachdraidh seo a’ dol le Flying Fiddles.

Ged a tha iad òg, tha i a’ faicinn tòrr tàileant sa chòmhlan a tha tighinn air adhart fad an t-siubhal agus tha i daonnan a’ toirt misneachadh dhaibh a bhith sgrìobhadh a’ chiùil aca fhèin.

’S e Anna-Wendy Stevenson an stiùriche-ciùil airson Flying Fiddles agus tha i air fàs uabhasach pròiseil mur deidhinn bhon a thòisich i ag obair còmhla riutha ’s tha i a’ gealltainn ceòl sònraichte math dhan a h-uile duine a nochdas air an oidhche.

Tha na fidhlearan seo sàr math air cluich an-dràsta agus chan eil iad fiù ’s ochd bliadhna deug a dh’aois … smaoinich dè cho math sa dh’fhaodadh e a bhith, a’ bruidhinn ri càraid ann an dèich bliadhna ’s a bhith ag ràdh gum fàca tu iad nuair a bha iad beag?

(… agus an uair sin smaoinich dè cho math sa bhiodh e a bhith sealltainn dhaibh CD a cheannaich thu bhuaibh air an oidhche?! Bithidh iad ga chreic aig an doras!)