Sgleog

An dàrna phairt de Grindhouse a’ togail an sgeul bho dheireadh Death Proof. 

Tha am film seo air tighinn gu bìth airson aon adhbhar agus ’s e sin airson feìsdeadh luchd leantainn eudmhòrach filmichean. Tha Planet Terror ro èibhinn a bhith eagallach agus às dèidh a bhith faicinn mìltean de filmichean “Zombie” ron a seo cha robh mi smaointinn gun robh an cothrom ann siàn as ùr fhaighinn a-mach às an roinn seo ach chòrd am film seo rium nas fheàrr na bha mi an dùil!
Tha am film a’ fosgladh le trailear ‘Spoof’ airson Machete… film amaideach làn clìches a’ leantainn duine leis an t-ainm Machete, duine cunnartach a chaidh a freumadh agus a-nis tha e dol a chur às don h-uile duine a bha an sàs ann! Bha a h-uile duine san taigh deilbh lùbte dùbailte leis a’ ghàireachdainn agus às dèidh sin bha iad deiseil airson rud sam bith!
Tha Planet Terror a’ cluich suas ris a h-uile cliché anns an roinn Zombie agus chan eil e toirt mionaid airson smaoineachadh: “Is dòcha gu bheil sinn air a dhol ro fhada an trup seo?” Ma tha sibh air am film “From Dusk Til Dawn” fhaicinn, bidh fios agaibh dè cho math sa tha e nuair a tha Robert Rodriguez a’ dèanamh film far a bheil feum aige a chur às do dh’uile-bhèistean. Tha a mhacmeanma mìorbhailleach math aige airson suidheachan cunnartach a chruthachadh agus a bhith gan cuir ceart le neart agus fùdar-ghunna!
Cha chòrd e ris a h-uile duine ge-tà! Choisich dithis nighnean a-mach às an fhilm às dèidh uair an uaireadair ach dè bha iad a’ smaointinn a bha dol a thachairt? Cheannaich iad tiocaid airson film leis an t-ainm Planet Terror… film air an robh iad ro òg a bhith faicinn anns a’ chiad àite, le dealbh do bhoireannach le gunna sprèidheadh far am bu chòir do chas a bhith! Dè seòrsa film a bha iad an dùil fhaicinn? Sleepless in Sauchiehall St?
Uill, thug sin gàire orm agus fhuair mi tòrr thoileachas a-mach às an fhilm gu lèir le gaire ann gach mionaid lè tòrr chleasaichean bho na filmichean as motha bho na h-ochdadan a’ tilleadh dhan sgrìn mhòr! A bheil cuimhne agaibh air Michael Biehn agus Josh Brolin? Tha mi cinnteach nach eil ach bha còig mionaid de chliù aca le na filmichean, The Terminator agus The Goonies! A bharrachd air sin ge-tà, tha sinn a’ faicinn chleasaichean ùra mar Sayid a bh’ ann an Lost agus Federico a bh’ ann an Six Feet Under a’ dèanamh uabhasach fhèin math a’ cluich phàirtean eadar-dhealaichte bhon a tha iad cleachdte.

Sgeulachd amaideach air an sàr mhath a chur ri chèile! Ged am faod thu bus a dhràibheadh tro na tuill san fhilm seo, chan eil e toirt air falbh bho film a tha coimhead sgoinneal, làn ghaireachadaich, aigsean agus macmeanmna! Còrdaidh am film seo ri daoine sam bith a tha tuigsinn nach eil e feuchainn a bhith stollta fìr ’s gu bheil e ann airson fealla-dhà. Cha chòrd e ri luchd-leantainn na “chick-flicks.”

4.5/5