Sgleog

SEACHD: THE INACCESSIBLE PINNACLE

An ceum as motha ann am film Breatannach ann am bliadhnaichean! A’ chiad film feature length ann an Gàidhlig rìamh … ’s mar sin chan eil Gàidhlig agam airson feature length! Air a losgadh anns na sgìrean ’s na h-oiseanan as brèagha air Eilean a’ Cheò! Aodannan agus tàileantan ùr Albannach dha-rìreabh! Am fàca sibh na tha iad air sgrìobhadh mu dheidhinn anns na pàipearan?!! Chan eil facal dona aig gin aca a ràdh mu dheidhinn!

Tha am film a’ toirt sùil a-steach dhan saoghal beul-aithris nan Gàidheal troimh charactair an Seanair. Aig an aon àm tha sinn a’ leantainn an càirdeis eadar e fhèin agus an ogha as òige don aon ainm, Aonghas, agus chan eil sinn fada a’ dol seachad mus ionnsaich sinn gu bheil sgeul aige airson a h-uile suidheachadh!


Às dèidh bàs a phàrantan tha Aonghas òg, a bhràthair ’s a phiuthar a’ gluasad gu taigh a Sheanair far a bheil an triùir aca air a bhogadh ann an seann sgeulachdan: bho eich-uisge suas ri cron gu dròighearachd aig àm nam Fuadaichean tha measgachadh de sgeulachdan a tha toirt dhuinn blas air dòigh beatha ar shìn sheanairean.

Ann an dòigh shonraichte spaideil, nach eil sinn air faicinn air na mìltean de phrògraman eachdraidh Ghàidhlig a th’ air a bhith ann ron seo, tha “Seachd” a’ toirt dhuinn beul-aithris ar dùthcha, beul-aithris nach robh rìamh sgrìobhte, air a chur gu film airson an t-saoghail gu lèir a chluinntinn agus fhaicinn.

Agus tha sinn uile airson barrachd filmichean mar seo fhaicinn! Tha an saoghal airson barrachd fhaicinn! Tha mi cinnteach gun dèan e an t-uabhas airson ìomhaigh na Gàidhlig agus airson turasdail cuideachd!

Film math dha-rìribh agus sanasachd math dha-rìribh cuideachd! Bidh tòrr a-bharrachd daoine airson Gàidhlig ionnsachadh, bho sin tha mi cìnnteach!

4.5/5